ӘЛЕУМЕТТІК ҚОЛДАУДЫҢ ТИІМДІЛІГІ БӨЛІНГЕН ҚАРАЖАТ КӨЛЕМІМЕН ҒАНА ЕМЕС, ОНЫҢ НАҚТЫ НӘТИЖЕСІМЕН ӨЛШЕНУІ КЕРЕК.

Мемлекеттік әлеуметтік қолдау жүйесінде маңызды өзгерістер қарастырылуда. Негізгі ұстаным — көмекті азаматтар санына ғана қарап емес, адамның нақты қажеттілігіне қарай көрсету. Президент Қасым-Жомарт Тоқаев бұған дейін әлеуметтік көмек шын мәнінде мұқтаж азаматтарға берілуі керек екенін атап өткен.

Еңбек министрі Асқарбек Ертаев та әлеуметтік қолдаудың проактивті моделіне көшу қажеттігін айтып отыр. Яғни мемлекет азаматтың көмек сұрап жүгінуін күтпей, оның қиын жағдайға тап болғанын алдын ала анықтап, тиісті қолдау шараларын ұсынуы қажет. Бұл — әлеуметтік саясаттағы маңызды өзгеріс және оны қоғам кеңінен талқылауы тиіс.

«Азаматтың көмек сұрап келуін күтпеу» дегеніміз не?

Жаңа тәсілдің мақсаты — азаматтардың қажетті ақпаратты өз бетінше іздеуіне, түрлі мекемелерге баруына және көптеген құжат жинауына кететін уақыт пен күшті азайту.

Министрлік әлеуметтік қолдау мен жұмыспен қамту саласында проактивті қызмет көрсету тетіктерін дамытып жатыр. Цифрлық деректерді пайдалану арқылы адамның қиын өмірлік жағдайын ертерек анықтап, оған қажетті көмек түрлерін алдын ала ұсыну көзделеді.

Әлеуметтік саясаттың түпкі мақсаты — адамның мүмкіндігін кеңейту және оның қалыпты өмір сүруіне жағдай жасау. Бұл әсіресе балаларға қатысты мәселелерде маңызды. Әлеуметтік қолдаудың тиімділігі бөлінген қаражат көлемімен ғана емес, оның нақты нәтижесімен өлшенуі керек.

Мәселе көмекке қанша қаражат жұмсалғанында емес, оның кімге және қаншалықты тиімді жеткенінде.

Мұқтаж отбасы қажетті қолдауды алды ма? Балаға керек қызметтер мен құралдарға қолжетімділік қамтамасыз етілді ме? Азамат жұмысқа орналаса алды ма? Мемлекеттік қызметтерді алу жеңілдеді ме?

Әлеуметтік реформалардың нәтижесін бағалағанда, ең алдымен осы сұрақтарға нақты жауап берілуі қажет.

Мемлекет пен қоғамның ортақ мақсаты — көмекке мұқтаж азаматтың қолдаусыз қалмауын қамтамасыз ету.